ಶ್ರೀ ಕ್ಷೇತ್ರ ಕೂಡ್ಲು ಬಾಡಬೆಟ್ಟಿನ ಶ್ರೀ ಶನೀಶ್ವರನ ಸನ್ನಿಧಾನದ ಕಿರುಪರಿಚಯ

ಕನ್ನಡನಾಡಿನ ಹಲವಾರು ಶಕ್ತಿ ದೇವಾನು-ದೇವತೆಯರ ಕ್ಷೇತ್ರಗಳ ಸಾಲಿನಲ್ಲಿ ಉಡುಪಿ ಜಿಲ್ಲೆಯ ಕುಂದಗನ್ನಡದ ತವರೂರಾದ ಈ ನಮ್ಮ ಕುಂದಾಪುರವೂ ಸಹ ಸೇರಿರುತ್ತದೆ. ಕರಾವಳಿ, ಮಲೆನಾಡು ಮತ್ತು ಬಯಲು ಸೀಮೆಗಳೆಂಬ ಮೂರು ಭೂಪ್ರದೇಶಗಳ ಸಂಗಮವಾಗಿದೆ. ಮೈಲುಗಟ್ಟಲೆ ಕಡಲ ಕಿನಾರೆ. ನಿಸ್ವಾರ್ಥ ಮನೋಭಾವದ ಜನಸಮೂಹ, ದೈವೀ-ದೇವಿಗಳ ಆಲಯಗಳು, ಎಲ್ಲವೂ ಸಹ ಈ ಕರುನಾಡ ವನದೇವಿಯ ಸಿರಿಮುಡಿಯಲ್ಲಿ ಹಚ್ಚಹಸುರಿನ ತಾಣಗಳ ನಡುವೆ ಭವ್ಯವಾಗಿ ಕಂಗೊಳಿಸುತ್ತವೆ. ಇಂತಹುದೇ ವನಸಿರಿಯ ಮಡಿಲಲ್ಲಿ, ಒಂದು ಪ್ರದೇಶದ ನೀರನ್ನೇ ಒಣಗಿಸಿ ನೆಲವನ್ನು ಬರಡು ಮಾಡಿ, ಬಿರುಕು ಮೂಡಿಸಿ, ಮಾನವನ ಗಂಟಲಿನ ನೀರಿನ ಪಸೆಯನ್ನ ಒಣಗಿಸಲೂ ಬಲ್ಲ ಭೂದೇವಿ ತನ್ನ ಆಕ್ರೋಶ, ಆವೇಶವನ್ನೆಲ್ಲಾ ಒಮ್ಮೆಲೇ ಪ್ರದರ್ಶಿಸಿದ್ದಾಳೆ ಬೇರಾವ ಸಂಶಯವೂ ಇಲ್ಲವೆನ್ನುವುದಕ್ಕೆ ಸಾಕ್ಷಿಯಾಗಿ, ಹಚ್ಚ-ಹಸಿರೆಲ್ಲಾ ಮುದುಡಿ ಬಾಡಿ ಹಾಗೆ ಸುಮ್ಮನೇ ಉದುರಿ ಹೋದಂತೆ ಕಂಡುಬಂದ ರುದ್ರ ರಮಣೀಯ ಸ್ಥಳವಾದ ಬರಡು-ಬಂಜರು ಭೂಮಿ; ಬಾಡಿಹೋದ ಬೆಟ್ಟು ಅದುವೇ, ಬಾಡಬೆಟ್ಟು.

ಉಡುಪಿ ಜಿಲ್ಲೆಯ ಕುಂದಾಪುರ ತಾಲೂಕಿನ ತಲ್ಲೂರಿನಿಂದ ಮೂಡು ದಿಕ್ಕಿಗೆ ಸಾಗುವ ಒಂದು ಅಗಲ ಕಿರಿದಾದ ರಸ್ತೆಯಲ್ಲಿ 4-5 K.m. ಹಾಗೆ ಕಾಲ್ನಡಿಗೆಯಲ್ಲಿ ಅಥವಾ, ವಾಹನಗಳಲ್ಲಿ ನೇರ ಸಾಗುತ್ತಾ ಹೋದರೆ ಕಾಣ ಸಿಗುವ, ಈ ನಿಡಿದಾದ ಕಾಡು-ಮೇಡಿನಂತಿರುವ ಬಿಳಲುಗಳ ನಡುವೆ ಅಡಿಯನ್ನಿಟ್ಟ ಕೂಡಲೇ, ಕೂಗಳತೆಯ ದೂರದಲ್ಲಿ ಪುಟ್ಟದೊಂದು ಗುಡಿ ಚಿಗುರೊಡೆದು, ದಿವ್ಯ ಭವ್ಯವಾಗಿ ಸತ್ಯಧರ್ಮಗಳ ತವರೂರಾಗಿ ಕಣ್ಮನ ಸೆಳೆಯುವುದು ಆ ವಿಶಾಲವಾದ ಒಂದು ಆರಾಧನಾ ಸ್ಥಳವಿದುವೇ, ಕೂಡ್ಲು ಬಾಡಬೆಟ್ಟು ಶ್ರೀ ಶನೀಶ್ವರ ಸ್ವಾಮಿಯ ಕ್ಷೇತ್ರ. ಇಲ್ಲಿ ಬರುವಾಗ, ಮೊದಲಾಗಿ ಕಾಣಸಿಗುವ ಸ್ಥಳವೇ ಸ್ವಾಮಿದೇವರ ಕೂಡ್ಲು .ಇಲ್ಲಿಯೇ, ಈ ಶನೀಶ್ವರ ಸ್ವಾಮಿ ದೇವರ ನೆಲೆ!