43 ವರ್ಷಗಳ ಇತಿಹಾಸವಿರುವ ಈ ಹಿನ್ನಲೆಯಲ್ಲಿ, ಗುಲ್ವಾಡಿಯಲ್ಲಿ ವಾಸವಾಗಿದ್ದ ಮರ್ಲಣ್ಣ ಹಾಗೂ ಅವರ ಸಂಸಾರ ಕೂಡ್ಲು ಬಾಡಬೆಟ್ಟಿನ ಸ್ವಾಮಿ ದೇವರ ಕೂಡ್ಲು ಹತ್ತಿರದ ಕಾಡು ಪ್ರದೇಶದಲ್ಲಿ ನೆಲೆನಿಂತ ಮದಗದ ಬಳಿ ಇರುವ ಕಿರಿದಾದ ಕೊಳವೆಯ ನೀರನ್ನು ಕುಡಿಯಲು ಹಾಗೂ ದಿನನಿತ್ಯದ ಬಳಕೆಗೆ ಉಪಯೋಗಿಸುತ್ತಿದ್ದರೆನ್ನಲಾದ ಆ ಜಾಗದಲ್ಲಿ ದಿನನಿತ್ಯವೂ ಬಲವಾದ ಸರ್ಪವೊಂದರ ಸಂಚಾರವಾಗುತ್ತಿತ್ತು. ತನ್ನಡೀ; ಸಂಚಾರದಡೀ ಎಲ್ಲಿಯಾದರೂ ಅಶುಚಿ-ಮಲಿನತೆ ಕಂಡುಬಂದಾಗಲೆಲ್ಲಾ ಯಾರಿಗೂ ಆ ನೀರನ್ನು ಕೊಂಚ ಸ್ಪರ್ಶಿಸಲು ಕೂಡ ಬಿಡುತ್ತಿರಲಿಲ್ಲವಾಗಿತ್ತು. ಹಾಗಾಗಿ, ನಾಗದೋಷಕ್ಕೆ ಗುರಿಯಾಗಬಾರದೆನ್ನುವ ಕಾರಣಕ್ಕೇ ಜನ ತಗ್ಗಿ-ಬಗ್ಗಿ ನಡೆದು ಆದಷ್ಟು ಆ ಜಾಗವನ್ನು ಶುಚಿಯಾಗಿರಿಸುತ್ತಿದ್ದರು.ಇಷ್ಟರಲ್ಲಿಯೇ, ಇಲ್ಲಿಯೇ ಸಮೀಪ ವಾಸ್ತವ್ಯ ಹೂಡಿದ್ದ ಮರ್ಲಣ್ಣ ಎನ್ನುವವರು ತೆಂಗು ಬಾಳೆ-ಅಡಿಕೆ ಇತ್ಯಾದಿಗಳನ್ನು ಬೆಳೆಸಿ ತಮ್ಮ ಕೃಷಿಯೇತರ ಉದ್ಯೋಗವನ್ನಾಗಲೇ ಶುರುಮಾಡಿದ್ದ ಕೆಲವೇ ವರ್ಷಗಳಲ್ಲಿ ಅವರು ಅನಾರೋಗ್ಯಕ್ಕೆ ತುತ್ತಾದರು. ಧೈರ್ಯಗುಂದದೇ, ಸಕಲ ದೇವಾನು-ದೇವತೆಯರಿಗೆ ಹರಕೆಯನ್ನಿರಿಸಿಕೊಂಡು ವೈದ್ಯರ ಮೊರೆ ಹೋಗಿ ಸೂಕ್ತ ಚಿಕಿತ್ಸೆ ಪಡೆದು, ಸಂಪೂರ್ಣವಾಗಿ ಗುಣಮುಖರಾದರು ಕೂಡ. ಆದರೆ ಅದೇಕೋ..ಏನೋ! ಅತ್ತಿತ್ತ ಅಲೆದಾಡಿ ಸುತ್ತಾಡುತ್ತಿದ್ದ ಸರ್ಪಕ್ಕೆ ಒಂದು ನೆಲೆಯಾಗಬೇಕೆಂದುಕೊಂಡ ಕುಟುಂಬ, ಸ್ವಾಮಿ ದೇವರ ಕೂಡ್ಲುವಿನ ಸ್ವಾಮಿ ದೇವರ ಸನ್ನಿಧಿಯಲ್ಲಿ ನಾಗಪ್ರತಿಷ್ಟೆಯೂ ಕೂಡ ಮಾಡಿದರು. ಆಪತ್ಕಾಲದಲ್ಲಿ ಹೇಳಿಕೊಂಡ ಸಕಲ ಹರಕೆ ಸೇವೆಗಳನ್ನು ಕಾಲಕ್ರಮೇಣ, ಒಂದೊಂದಾಗಿ ನೆರವೇರಿಸುತ್ತಾ ಬಂದ ಹಾಗೆ, ಅಲ್ಲಿಂದ ಇವರ ಕುಟುಂಬಕ್ಕೆ ಹೊಸದೊಂದು ಚೈತನ್ಯದ ಚಿಲುಮೆ ಮೂಡತೊಡಗಿದರೂ ಸಹ, ಮಾರಣಕಟ್ಟೆ ಕ್ಷೇತ್ರಕ್ಕೆ ಬೆಳಕಿನ ಸೇವೆಯಿನ್ನೂ ನೆರವೇರಿಸಬೇಕೆನ್ನುವ ಅಂಶವೊಂದು ಕನಸಿನ ರೂಪದಲ್ಲಿ ಬಂದು ಕುಟುಂಬದ ಗಮನಕ್ಕೆ ಆಗಾಗ್ಗೆ ಗೋಚರಿಸುವಂತೆ ಬರುತ್ತಿತ್ತು.
ಅದೇ ಸಮಯಕ್ಕೆ ಸರಿಯಾಗಿ, ತಮ್ಮ ವಿದ್ಯಾಭ್ಯಾಸವನ್ನು ಒಂದು ಹಂತದವರೆಗೆ ಮುಗಿಸಿ, ಕೂಲಿ ಕಾರ್ಮಿಕರಾಗಿ ದುಡಿಯುತ್ತಿದ್ದ ಮರ್ಲಣ್ಣನವರ ಚತುರ್ಥ ಪುತ್ರ ಶ್ರೀ ಜಯರಾಮ (ಪ್ರಸ್ತುತ, ಶ್ರೀ ಕ್ಷೇತ್ರದ ಧರ್ಮದರ್ಶಿಗಳು) ಇವರಿಗೆ, ನಿದ್ದೆಯಲ್ಲಿ ಉಸಿರುಗಟ್ಟಿಸಿದಂತಾಗುವುದು, ಭಯ-ಆತಂಕವೆಲ್ಲಾ ಮನದಿ ಒಮ್ಮೆಲೇ ಆವರಿಸಿದಂತಾಗುವುದು, ಅಗೋಚರ ಶಬ್ಧಗಳ ಆಲಾಪ -ಹೀಗೆ, ಒಂದರ ಮೇಲೊಂದು ಚಿತ್ರ-ವಿಚಿತ್ರ ತಾಪತ್ರಯಗಳು ಗೋಚರಕ್ಕೆ ಬರತೊಡಗಿದವು. ಜನಸಾಮಾನ್ಯರಂತೆ ಕಾರಣ ತಿಳಿಯಲು ಸಹಜವಾಗಿಯೇ ಜ್ಯೋತಿಷಿಯ ಬಳಿ ಅವರು ಸಾಗಿದಾಗ, ನಾನಾ ರೀತಿಯ ವಾಮಾಚಾರ, ಕೃತ್ರಿಮ ದೋಷದ ಪರಿಣಾಮವೇ ಇದೆಲ್ಲಾ ಎಂಬ ಮಾಹಿತಿಯನ್ನರಿತು, ಪರಿಹಾರಕ್ಕೆಂದು ಸಂಬಂಧಪಟ್ಟ ಸಕಲ ಉಚ್ಛಾಟನಾ ಹೋಮವನ್ನು ಕೂಡ ಮೇಲಿಂದ-ಮೇಲೆ ಮಾಡಬೇಕಾದ ಅನಿವಾರ್ಯ ಪರಿಸ್ಥಿತಿ ಇವರಿಗೆದುರಾಗಿ ಬಂತು, ಆದರೂ ಕೂಡ, ಅದು ಫಲಕಾರಿಯಾಗಲಿಲ್ಲವೆನ್ನುವಂತೆ ಸಮಸ್ಯೆಗಳು ಮತ್ತಷ್ಟು ಉಲ್ಬಣಗೊಂಡು ಇಡೀ ಮರ್ಲಣ್ಣನವರ ಸಂಸಾರವನ್ನೇ ಅತೀವವಾಗಿ ಕಾಡಿ, ಸಮಸ್ಯೆಗಳ ಸುಳಿಯಲ್ಲಿ ಒಬ್ಬೊಬ್ಬರನ್ನೇ ಸಿಲುಕಿಸಿತು.